Luke 24

1¶ Nau long namba wan de bilong wik, long moningtaim tru tru, ol i kam long matmat, na bringim ol dispela spais ol i bin redim, na sampela arapela i kam wantaim ol. 2Na ol i luksave long ol i bin tantanim ston i lusim matmat. 3Na ol i go insait, na ol i no lukim bodi bilong Bikpela Jisas. 4Na em i kamap olsem, taim ol i paul planti long dispela hap nabaut, lukim, tupela man i sanap klostu long ol long ol klos i lait tru. 5Na taim ol i pret, na lindaunim ol pes bilong ol long graun, ol i tokim ol, Bilong wanem yupela i painim man i stap laip namel long ol daiman? 6Em i no stap hia, tasol em i kirap bek. Tingim gen long em i bin tokim yupela olsem wanem taim em i stap yet long Galili, 7I spik, Ol i mas givim Pikinini Man bilong man i go long ol han bilong ol man i pulap long sin, na nilim em long diwai kros, na namba tri de em i mas kirap bek gen. 8Na ol i tingim gen ol toktok bilong em, 9Na ol i go bek i lusim matmat, na tokim olgeta dispela samting long dispela elevenpela, na long olgeta arapela. 10Em i Maria Makdalin, na Joana, na Maria mama bilong Jems, na ol arapela meri husat i stap wantaim ol, husat i tokim ol dispela samting i go long ol aposel. 11Na ol toktok bilong ol i luk olsem long ol olsem ol stori nating, na ol i no bilipim ol. 12Nau Pita i kirap, na ran i go long matmat. Na taim em i lindaun, em i lukim ol klos bilong naispela laplap i slip ol yet, na em i lusim hap, na tingting planti insait long em yet long dispela samting i kamap olsem. 13¶ Na, lukim, tupela bilong ol i go long dispela de stret long wanpela vilis ol i kolim Emeas, dispela i stap long Jerusalem klostu olsem 60 furlong. 14Na tupela i toktok wantaim long olgeta dispela samting, dispela i bin kamap. 15Na em i kamap olsem, long, taim tupela i stori wantaim na wok long stretim tok, Jisas em yet i kam klostu, na go wantaim ol. 16Tasol ol ai bilong ol i pas inap long ol i no ken save long em. 17Na em i tokim ol, Ol dispela em ol wanem kain toktok, dispela yupela i gat wanpela i go long narapela, taim yupela i wokabaut, na yupela i pilim hevi? 18Na wanpela bilong tupela, husat nem bilong em em Kliopas, i bekim tok long em, Ating yu wanpela ausait man tasol long Jerusalem, na yu no bin save long ol dispela samting i kamap olsem long dispela hap long ol dispela de? 19Na em i tokim tupela, Wanem ol samting? Na ol i tokim em, Long sait bilong Jisas bilong Nasaret, husat i wanpela strongpela profet long wok na tok long ai bilong God na olgeta manmeri. 20Na long ol bikpris na ol hetman bilong mipela i bin givim em olsem wanem long mekim em lus long kot i go long dai, na long ol i bin nilim em long diwai kros. 21Tasol mipela i putim bilip long em i bin stap em husat i mas baim bek Isrel. Na narapela long olgeta dispela, tude em i namba tri de bihain long ol i bin mekim ol dispela samting. 22Yes, na sampela meri tu bilong lain bilong mipela i bin mekim mipela kirap nogut, husat i stap long moning tru long matmat. 23Na taim ol i no lukim bodi bilong em, ol i kam, na spik, long ol i bin lukim tu wanpela driman samting bilong ol ensel, husat i tok long em i stap laip. 24Na sampela bilong ol husat i stap wantaim mipela i go long matmat, na lukim dispela, yes, olsem ol meri i bin toktok. Tasol ol i no lukim em. 25Nau em i tokim ol, O ol krankiman, na ol man bel i no hariap long bilipim olgeta samting ol profet i bin toktok. 26Ating i yes long Kraist i mas pilim pen long ol dispela samting, na long go insait long glori bilong em? 27Na i stat long Moses na olgeta profet, em i kolim gut long ol, long olgeta rait bilong God, ol samting long sait bilong em yet. 28Na ol i kam klostu long dispela vilis, we ol i go. Na em i mekim olsem em i gat laik long go moa. 29Tasol ol i pulim em strong, i spik, Stap wantaim mipela. Long wanem, em i go long apinun tru, na klostu de em i lus pinis. Na em i go insait long stap yet wantaim ol. 30Na em i kamap olsem, taim em i sindaun wantaim ol long kaikai, em i kisim bret, na blesim dispela, na brukim, na givim long tupela. 31Na ol ai bilong tupela i op, na ol i save long em. Na em i go pinis olgeta i lusim hap ai bilong ol i ken lukim. 32Na tupela i tok wanpela i go long narapela, Ating i yes long bel bilong yumitupela i bin kuk insait long yumitupela, taim em i toktok wantaim yumitupela long rot, na taim em i opim ol rait bilong God long yumitupela? 33Na ol i kirap long dispela aua stret, na go bek long Jerusalem, na lukim dispela elevenpela i bung wantaim, na ol husat i stap wantaim ol, 34I spik, Bikpela i bin kirap bek tru tru, na em i bin kamap ples klia long Saimon. 35Na ol i tokaut long wanem ol samting i kamap long rot, na long ol i save long em long taim em i brukim bret olsem wanem. 36¶ Na taim ol i toktok olsem, Jisas em yet i sanap namel long ol, na tokim ol, Bel isi i ken stap long yupela. 37Tasol ol i pret nogut tru na pret, na ol i ting olsem long ol i bin lukim wanpela spirit. 38Na em i tokim ol, Bilong wanem yupela i pilim wari? Na bilong wanem ol tingting bilong yupela i kirap insait long ol bel bilong yupela? 39Lukim tupela han bilong mi na tupela fut bilong mi, long dispela em mi mi yet. Putim han long mi, na luksave. Long wanem, wanpela spirit i no gat bodi na ol bun, olsem yupela i luksave long mi gat. 40Na taim em i bin toktok olsem, em i soim ol tupela han bilong em na tupela fut bilong em. 41Na taim ol i no bilip yet, long wanem, ol i amamas tru, na tingting planti, em i tokim ol, Yupela i gat sampela kaikai long hia? 42Na ol i givim em wanpela hap bilong wanpela pis ol i kukim long paia, na bilong wanpela kom bilong hani. 43Na em i kisim dispela, na em i bin kaikai long ai bilong ol. 44Na em i tokim ol, Ol dispela em ol toktok, dispela mi tokim yupela, taim mi stap yet wantaim yupela, long olgeta samting i mas kamap pinis, dispela ol i raitim long lo bilong Moses, na long ol profet, na long ol sam, long sait bilong mi. 45Nau em i opim save bilong ol, inap long ol i ken kisim save long ol rait bilong God, 46Na em i tokim ol, Rait i stap pinis olsem, na em i gutpela olsem long Kraist long pilim pen, na long kirap bek long dai namba tri de. 47Na long nem bilong em ol i ken autim tok long tanim bel na pasin bilong lusim ol sin namel long olgeta kantri, i stat long Jerusalem. 48Na yupela i stap ol witnes bilong ol dispela samting. 49Na, lukim, mi salim promis bilong Papa bilong mi antap long yupela. Tasol yupela i mas stap yet long biktaun bilong Jerusalem, inap long yupela i pulap wantaim pawa i kam long antap. 50¶ Na em i stiaim ol i go ausait i go inap long Betani, na em i litimapim tupela han bilong em, na blesim ol. 51Na em i kamap olsem, taim em i blesim ol, em i lusim ol, na God i karim em i go antap long heven. 52Na ol i lotuim em, na go bek long Jerusalem wantaim bikpela amamas tru. 53Na ol i stap olgeta taim long tempel, na litimapim nem na blesim God. Amen.